Bhagavad Gita: Chapter 12, Verse 9

அத² சி¹த்¹த¹ம் ஸமாதா⁴து¹ம் ந ஶக்¹னோஷி மயி ஸ்தி²ரம் |

அப்⁴யாஸயோகே³ன த¹தோ¹மாமிச்¹சா²ப்¹து¹ம் த⁴னஞ்ஜய ||9||

அத—--ஆனால்; சித்தம்--—மனதை; ஸமாதாதும்--—நிலைநிறுத்த; ந ஶக்னோஷி--—(உன்னால்) முடியா விட்டால்; மயி--—என் மீது; ஸ்திரம்--—நிலையாக; அப்யாஸ-யோகேன--தொடரந்த பயிற்சியின் மூலம் கடவுளுடன் ஐக்கியப்பட்டு; ததஹ--—பின்னர்; மாம்--—என்னை; இச்சா--—ஆசையை; ஆப்தும்--—அடைவாய்; தனஞ்ஜய--- அர்ஜுனன், செல்வத்தை வென்றவன்

Translation

BG 12.9: அர்ஜுனன், உன்னால் என்மீது மனதை நிலையாக நிலை நிறுத்த முடியாவிட்டால், உலக விவகாரங்களிலிருந்து மனதைத் தொடர்ந்து அடக்கிக்கொண்டு பக்தியுடன் என்னை நினைவுகூறப் பழகு.

Commentary

ஸ்ரீ கிருஷ்ணரின் மீது மனதை நிலைநிறுத்துவதன் மூலம், நமது ஆன்மிகப் பயிற்சியை முழுமையாக்க முடியும். ஆனால் நாம் இந்தப் பாதையில் செல்லத் தொடங்கியவுடனேயே முழுமையடைந்துவிடுவோம் என்று எதிர்பார்க்க முடியாது. அப்படியானால், கடவுளின் மீது தங்கள் மனதை முழுமையாக நிலைநிறுத்த முடியாதவர்கள் என்ன செய்ய வேண்டும்? பக்தியுடன் அவரை நினைவுகூற முயல வேண்டும் என்று ஸ்ரீ கிருஷ்ணர் இங்கே கூறுகிறார். பழமொழி கூறுவது போல், 'பயிற்சி குறைபாடு அற்றதாக ஆக்குகிறது .' இது அப்⁴யாஸ யோக³ம் அல்லது 'மீண்டும் மீண்டும் பயிற்சி செய்வதன் மூலம் கடவுளுடன் ஐக்கியம்' என்று அழைக்கப்படுகிறது. ஒவ்வொரு முறையும் மனம் மற்ற பொருள்கள் மற்றும் எண்ணங்களை நோக்கி அலையும் போது, பக்தன் கடவுளின் நாமங்கள் வடிவங்கள், நல்லொழுக்கங்கள்,பொழுதுபோக்குகள், உறைவிடங்கள் மற்றும் கூட்டாளிகளை நினைவுகூறுவதன் மூலம் அதை மீண்டும் கடவுளிடம் கொண்டு வர முயற்சிக்க வேண்டும்.

ஜகத்குரு ஸ்ரீ கிருபாலுஜி மஹராஜ் ஆன்மீக பயிற்சியாளர்களுக்கு தனது அறிவுறுத்தல்களில் மீண்டும் மீண்டும் பயிற்சி செய்வதை வலியுறுத்துகிறார்:

ஜக³த¹ தே¹மன கோ¹ ஹடா¹ க¹ர, லகா³ ஹரி மே ப்¹யாரே

இஸி கா¹ அப்⁴யாஸ பு¹னி பு¹னி, க¹ரு நிரந்த¹ர ப்¹யாரே

(ஸாத⁴னா க¹ரு ப்¹யாரே)

‘அன்பரே, மனதை உலகத்திலிருந்து அகற்றி, கடவுளின் மீது நிலைநிறுத்துங்கள். தொடர்ந்து, மீண்டும் மீண்டும் பயிற்சி செய்யுங்கள்!’